Rihanna Мумбайд Азийн хамгийн баян Ambani гэр бүлийн үдэшлэгт оролцжээ

Fenty Beauty арга хэмжээний дараа дуучин Ambani гэр бүлийн урилгыг хүлээн авсан байна

Дуучин Rihanna Мумбайд очих үеэрээ Азийн хамгийн баян гэр бүл гэгддэг Ambani нарын зохион байгуулсан оройн зоогт оролцжээ. Үдэшлэгийн зургуудыг Anant Ambani өөрийн Instagram хуудсандаа нийтэлсэн байна.

38 настай Rihanna саяхан өөрийн Fenty Beauty брэндийн арга хэмжээнд оролцохоор Мумбайд ирсэн аж. Үүний дараа тэрээр Ambani гэр бүлийн зоогийн урилгыг хүлээн авчээ. Rihanna тус гэр бүлтэй 2024 онд Anant Ambani болон Radhika Merchant нарын хуримын өмнөх үдэшлэг дээр дуулснаасаа хойш ойр харилцаатай болсон байна.

Зургуудын байдлаас харахад уг зоогт уригдсан гадаад оддын дунд Rihanna ганцаараа байсан бололтой. Тэрээр Энэтхэгт хамгийн эрхэм зочдод зориулан хийдэг Puja ёслолд оролцож, мөн уламжлалт өнгөний баярын арга хэмжээнд хамрагдсан байна.

Ambani гэр бүлийн хөрөнгө, тансаг хурим дахин анхаарал татав

Ambani гэр бүлийн тэргүүн Mukesh Ambani-ийн хөрөнгө 111 тэрбум ам.доллароор үнэлэгддэг. Тэрээр газрын тос боловсруулах, жижиглэн худалдаа, харилцаа холбоо, хүнсний худалдаа болон дижитал стриминг үйлчилгээний салбарт үйл ажиллагаа явуулдаг Reliance корпорацыг эзэмшдэг юм.

2024 онд Anant Ambani Radhika Merchant-тай гэрлэхэд тус гэр бүл хуримын арга хэмжээнд 600 сая ам.доллар зарцуулсан гэж мэдээлэгдэж байв. Тухайн ёслолд Bill Gates, Mark Zuckerberg болон түүний эхнэр Priscilla, Канадын Ерөнхий сайд асан Stephen Harper, Австралийн Ерөнхий сайд асан Kevin Rudd, Disney-ийн гүйцэтгэх захирал Bob Iger, Ivanka Trump зэрэг алдартай зочид оролцсон байна.

Rihanna тухайн хуримын өмнөх гала тоглолтын гол уран бүтээлчээр оролцсон бөгөөд түүний гонорар 7 сая ам.доллар байсан гэх мэдээлэл гарч байсан юм.

Ambani гэр бүлийн өв залгамжлагчийн хурим дээр дуулсан нь Rihanna-гийн хувьд тайзнаа гарсан ховор тохиолдлуудын нэг байв. Учир нь тэрээр rapper ASAP Rocky буюу Rakim Mayers-тай хамт анхны хүү RZA-гаа 2022 онд өлгийдөн авсныхаа дараа хөгжмийн карьераа түр зогсоосон билээ.

Одоо хосууд гурван хүүхэдтэй. Rihanna 2023 онд хоёр дахь хүү Riot-оо төрүүлсэн бол хоёр жилийн дараа охин Rocky-гаа өлгийдөн авсан байна.