Хосын салсан гэх цуурхал фэнүүдийг түгшээв
“Stranger Things” цувралын одод болох 32 настай Charlie Heaton, 31 настай Natalia Dyer нарыг 10 жил үргэлжилсэн харилцаагаа дуусгасан байж магадгүй гэх цуурхал цахим орчинд тарж байна. Хос өөрсдөө энэ мэдээллийг одоогоор батлаагүй ч цувралын фэнүүдийн дунд яриа хүчтэй өрнөжээ.
Тэдний салсан байж болзошгүй тухай анх поп соёлын алдарт блог Deuxmoi мэдээлсэн байна. Тус блог инсайдер эх сурвалжийн мэдээлэлд тулгуурлан Charlie, Natalia нарыг энэ оны эхээр “чимээгүйхэн” салсан гэж бичжээ. Гэхдээ портал уг мэдээлэл одоогоор зөвхөн цуурхлын түвшинд байгааг онцолсон байна.
Natalia Dyer өөр эрэгтэйтэй харагдсан гэх мэдээлэл гарчээ
Deuxmoi-ийн мэдээлснээр, сүүлийн үед Natalia Dyer хэд хэдэн удаа өөр нэг эрэгтэйтэй хамт явж байгаа нь ажиглагдсан гэх яриа гарсан байна. Энэ нь хосын салсан байж магадгүй гэх таамгийг улам өдөөжээ.
Гэсэн ч энэ талаар Natalia Dyer болон Charlie Heaton-ийн талаас албан ёсны тайлбар хийгээгүй. Тиймээс одоогоор уг мэдээллийг батлагдсан баримт гэж үзэх боломжгүй юм.
Хамгийн сүүлд өнгөрсөн оны арваннэгдүгээр сард хамт харагджээ
Фэнүүдийн анхаарлыг татаж буй өөр нэг зүйл нь Charlie Heaton, Natalia Dyer нарыг хамгийн сүүлд өнгөрсөн оны арваннэгдүгээр сард хамт олон нийтийн өмнө харагдсан явдал юм. Тэд тухайн үед “Stranger Things”-ийн тавдугаар улирлын хэвлэлийн аяны хүрээнд хамт оролцож байжээ.
Түүнээс хойш хос олон нийтийн арга хэмжээнд тус тусдаа ирэх болсон байна. Тухайлбал, зургаадугаар сарын 17-нд Charlie Heaton Нью-Йорк хотод болсон өөрийн дотнын найз, цувралын хамтран тоглогч Joe Keery-ийн тоглолтод ганцаараа очсон нь фэнүүдийн анхаарлыг татжээ.
Фэнүүдийн санал хоёр хуваагдав
Салалтын талаарх цуурхал гарсны дараа фэнүүдийн байр суурь хоёр хуваагдсан байна. Зарим нь энэ мэдээнд гуниглаж байгаагаа илэрхийлсэн бол зарим нь Deuxmoi-г найдвартай эх сурвалж биш гэж үзэн, мэдээлэлд эргэлзэж байна.
Нэгэн хэрэглэгч “Энэ цуурхлыг би хоёр жил тутамд нэг удаа хардаг юм шиг санагддаг. Харин хэдэн сарын дараа тэднийг дахиад хамт явж байгаагаар олж хардаг. Тэд маш нууцлаг хос, дээрээс нь Deuxmoi ер нь найдвартай эх сурвалж биш. Надад үүнд итгэхэд хэцүү байна” гэж бичжээ.
2015 онд зураг авалтын үеэр танилцсан
Natalia Dyer болон Charlie Heaton нар 2015 онд “Stranger Things” цувралын эхний улирлын зураг авалтын үеэр танилцсан. Нэг жилийн дараа тэднийг үерхэж байгаа гэх анхны цуурхал гарч эхэлсэн бөгөөд 2017 онд жүжигчид Fashion Awards ёслол дээр хосын хувиар анх удаа олон нийтийн өмнө гарч байжээ.
Хожим цувралыг бүтээгчдийн нэг Matt Duffer кастингийн шатанд л Heaton болон Dyer хоёрын хооронд онцгой химийн холбоо байгааг анзаарсан гэж ярьж байсан. Цувралын үйл явдлаар ч тэд хайр дурлалын холбоотой дүрүүдийг бүтээсэн юм.
Charlie Heaton өмнө нь Akiko Matsuura-тай холбоотой байсан
Natalia Dyer-тай үерхэхээс өмнө Charlie Heaton өөрөөсөө 14 насаар эгч япон хөгжимчин Akiko Matsuura-тай харилцаатай байсан. Тэдний дундаас Archie гэх хүү төрсөн бөгөөд одоо 12 настай аж.
Одоогоор Charlie Heaton, Natalia Dyer нарын харилцааны талаарх мэдээлэл албан ёсоор батлагдаагүй хэвээр байна. Гэсэн ч олон жилийн турш нууцлаг, тогтвортой хос гэгдэж ирсэн тэднийг тойрсон энэ цуурхал “Stranger Things”-ийн фэнүүдийн дунд томоохон ярианы сэдэв болоод байна.
