Justin Bieber-ийн эхнэр, 29 настай бизнес эрхлэгч, блогер Hailey Bieber нийгмийн сүлжээнд олон жил үргэлжилсэн дарамтаас болж амиа хорлох тухай бодож байсан үеэ хуваалцжээ. Тэрээр DealBook Summit чуулганд оролцохдоо нөхрийнх нь хуучин найз бүсгүй Selena Gomez-ийн зарим шүтэн бишрэгчийн дайралт сэтгэл зүйд нь хэрхэн нөлөөлснийг ярьсан байна.
Цахим доромжлол гудамжинд ч үргэлжилдэг байжээ
Hailey-гийн хэлснээр, Justin-тэй хайр сэтгэлийн холбоотой болсноос нь хойш түүний цахим хуудсанд өдөр бүр амиа хорлохыг шаардсан сэтгэгдэл ирдэг байжээ. Танихгүй хүмүүс гудамжинд доромжилж, зарим Starbucks кофены газарт өөрийг нь болон «нөгөө охин»-ыг сонгон санал өгөх маягаар цайны мөнгөний сав байрлуулдаг байсан гэж тэрээр ярьсан байна. Hailey энэ үеэр Selena Gomez-ийн нэрийг дурдаагүй аж.
«Сэтгэгдлээр өдөр бүр намайг амиа хорло гэж бичдэг байсан. Тэр үед хүмүүс гудамжинд над руу хашхирдаг байлаа… Би өмнө нь ийм зүйлтэй хэзээ ч тулгарч байгаагүй» хэмээн тэрээр хэлжээ.
Тасралтгүй дайралт нь нэгэн үед өөрийгөө огт байхгүй байсан нь дээр юм биш үү гэж бодоход хүргэсэн байна. Олон жилийн турш нийтэд доромжлуулсан нь сэтгэл зүйн хувьд илүү тэсвэртэй болгосон ч шүүмжлэлд огт эмзэглэхгүй болж чадаагүйгээ Hailey мөн тайлбарлажээ.
Justin-тэй 2018 онд гэрлэж, хүүтэй болсон
Холливудын Baldwin гэр бүлийн төлөөлөл Hailey, дуучин Justin Bieber нар 2015 онд болзож эхэлсэн бөгөөд гурван жилийн дараа гэрлэсэн юм. Хосууд 2024 онд Jack Blues хэмээх хүүтэй болжээ.
Харин Justin үүнээс өмнө Selena Gomez-той үерхэж байсан. Тэдний салж, эргэн нийлсэн харилцаа 2010-аад оны эхнээс 2018 оны хавар хүртэл үргэлжилсэн байна. Олон шүтэн бишрэгчтэй тэд Холливудын хамгийн их анхаарал татдаг хосуудын нэгд тооцогддог байв.
Эргэн нийлэх хүлээлт Hailey-г тойрсон цуурхалтай давхцжээ
Justin, Selena хоёр салсны дараа ч зарим шүтэн бишрэгч тэднийг дахин хамт болно гэж найдаж байжээ. Гэвч тийм зүйл болоогүй юм.
Энэ үеэр Hailey-г Justin-ы олон жилийн шүтэн бишрэгч байсан, түүнийг дагаж мөшгөдөг байсан гэх батлагдаагүй яриа тархсан байна. Мөн Selena-гийн хувцаслалт, биеэ авч явах байдлыг зориудаар дуурайдаг хэмээн буруутгах болсон нь түүнийг тойрсон цахим хэлэлцүүлгийн нэг хэсэг болжээ.