Театрын жүжигчин Kim Hyun Yi-г ижил нэртэй, нас барсан каскадёр жүжигчинтэй андуурч, түүний зургийг эмгэнэлийн мэдээнд ашигласан тохиолдол гарсны дараа тэрээр худал мэдээлэл тараасан хүмүүст хуулийн арга хэмжээ авахаа мэдэгджээ.
Kim Hyun Yi аравдугаар сарын 14-нд Instagram хуудсаараа дамжуулан нөхцөл байдлыг тайлбарлаж, өөрийн зураг нас барсан хүнийх мэт цахим орчинд тархаж байгаад бухимдаж буйгаа илэрхийлсэн байна.
Тэрээр:
“Надтай ижил нэртэй хүн нас барсан тухай мэдээ гарсны дараа миний нүүр царай бүхий зургуудыг талийгаачийн зураг мэтээр буруу нийтэлж, одоо ч цахим орчинд тараасаар байна”
хэмээн бичжээ.
Жүжигчин өөрийгөө нас барсан уран бүтээлчтэй ямар ч холбоогүй, огт өөр хүн гэдгийг онцлон тэмдэглэсэн байна.
“Би талийгаачтай огт өөр хүн бөгөөд энэ нөхцөл байдал надад ноцтой хохирол, сэтгэл санааны дарамт учруулж байна. Холбогдох бүх нотлох баримтыг цуглуулсан бөгөөд буруу мэдээлэл бүхий постуудыг устгуулах хүсэлт гаргахын зэрэгцээ шаардлагатай хуулийн арга хэмжээг авч эхэлсэн”
гэж Kim Hyun Yi мэдэгджээ.
“Буруу мэдээллийг цааш бүү түгээгээрэй”
Тэрээр мөн олон нийтэд хандан өөрийн зургийг нас барсан жүжигчнийх гэж андуурсан постуудыг дахин хуваалцахгүй байхыг хүссэн байна.
Kim Hyun Yi:
“Хэрэв та эдгээр нийтлэлийг харсан эсвэл намайг нас барсан хүн гэж андуурсан бол би тухайн хүн биш гэдгийг ойлгоорой”
хэмээн тайлбарлажээ.
Мөн:
“Буруу мэдээлэл цааш тархахгүй байхын тулд баталгаагүй зүйлсийг хөнгөн хуумгай бүү түгээгээрэй. Хэрэв ийм төрлийн пост тааралдвал надад мэдэгдэж өгнө үү”
гэж хүссэн байна.
Ижил нэртэй каскадёр жүжигчин Kim Hyun Yi өнгөрсөн наймдугаар сард зураг авалтын талбай руу явж байхдаа зам тээврийн осолд орж нас барсан юм.
Түүний нас барсан тухай мэдээлэл тухайн үед өргөн хүрээнд тархаагүй ч SBS-ийн “Doctor X: Mafia in White” болон tvN-ийн “100 Days of Deception” нэвтрүүлгүүдийн төгсгөлд дурсгалын бичлэг гарсны дараа олон нийт дахин анхаарч эхэлжээ.
Ингэснээр ижил нэртэй хоёр жүжигчнийг андуурах тохиолдол олширч, театрын жүжигчин Kim Hyun Yi-ийн зургийг нас барсан каскадёрынх мэтээр ашигласан постууд цахим орчинд түгсэн байна.
Үүний дараа амьд байгаа жүжигчин өөрийн хэн болохыг албан ёсоор тодруулж, буруу мэдээлэл тараасан контентыг устгуулах болон хууль эрх зүйн арга хэмжээ авах шийдвэр гаргажээ.
