Duolingo — гадаад хэл сурах хамгийн алдартай аппуудын нэг. 2012 онд нээлтээ хийсэн уг платформ өнөөдөр жилд 531 сая долларын орлого олдог, 7.7 тэрбум долларын үнэлгээтэй технологийн аварга болжээ. Түүнчлэн өдөр тутам идэвхтэй 34 сая хэрэглэгчтэй гэж компанийн зүгээс мэдээлсэн бөгөөд App Store дээр боловсролын аппуудын жагсаалтыг тогтмол тэргүүлсээр ирсэн.
Гэвч амжилттай апп бүр төгс байдаггүй. Duolingo нь хэл сурах сонирхлыг өдөөх тал дээр амжилттай ч, үнэхээр гүнзгий мэдлэг олгох чадвартай юу? Энэхүү нийтлэлээр энэхүү «ногоон ууль»-ын 4 гол сул талыг танилцуулж байна.
1. Ази хэл сурахад хангалтгүй
Солонгос, япон, хятад зэрэг Зүүн Азийн хэлнүүд тусгай бичиг үсэг, дүрмийн тогтолцоотой тул гүнзгий ойлголт шаардана. Жишээлбэл, япон, хятад хэлэнд хэрэглэгддэг ханз үсгийг үр дүнтэй сурахын тулд үндэс (部首)-ийг ойлгох, зурлагын дарааллыг дагаж бичих, түвшин тус бүрийн шалгалтад нийцэх ханз, үгийн санг эзэмших шаардлагатай.
Duolingo-д эдгээрийг гүнзгий задалсан, дасгалжуулсан хөтөлбөрүүд үгүйлэгддэг. Ханз үсгийг зөв бичих дадал суулгах практик хичээл байхгүй, үндэс бүтцийн тайлбар ч байдаггүй. Мөн хэлзүйн нарийвчилсан тайлбар дутмаг тул HSK, JLPT, TOPIK зэрэг олон улсын шалгалтад бэлдэхэд хангалтгүй.
2. Дунд, ахисан шатанд хүрэхэд саадтай
Duolingo таныг анхан шатанд өхөөрдөм хөгжилтэй хөтлөх ч, дунд болон түүнээс дээш шатанд хүрэхэд хангалтгүй. Урт текст унших, ярианы хэл дээр суурилсан сонсох дасгал хийх, эсвэл бичгийн чадвар хөгжүүлэх тал дээр дутагдалтай. Тус аппын үндсэн зарчим нь дахин давтах дээр тулгуурладаг тул нэг дүрэм эсвэл өгүүлбэрийг хэт олон удаа давтаж, хэрэглэгч уйдаж, ахиц гарахгүй удаашрах хандлагатай.
Түүнчлэн хэрэглэгч өдөрт хэдэн үг, дүрэм сурахыг өөрөө удирдах боломжгүй. Хэрэгцээт үгийн санг нэмэх, өөрийн зорилгоос хамаарч тохируулга хийх нөхцөл ч үгүйлэгддэг.
3. Цахим сүлжээний адил донтуулам хийц
Duolingo-ийн амжилтын нэг нууц бол TikTok, Instagram зэрэг платформтой төстэй хийц. Апп нь таны зан төлөвт тохируулсан мэдэгдэл илгээж, буцаж орж ирэхийг уриалдаг. Өдөр алгасахгүй давшилт хадгалах, урамшууллын систем нь хэрэглэгчийг байнга орж ирэхэд хүргэдэг ч, энэ нь заримдаа “допамин”-д суурилсан донтох мэдрэмж төрүүлж, бодит хэлний чадварыг нэмэгдүүлэхэд тийм ч их үр дүнтэй байдаггүй.
Цагийн хувьд харвал, таны Duolingo-д өнгөрүүлсэн цаг яг л цахим сүлжээнд гацсан мэт өнгөрдөг боловч хэлний мэдлэгт харьцангуй бага ахиц авчирдаг.
4. Бодит хэрэглээнээс хэтэрхий хол өгүүлбэрүүд
Тус аппын олон өгүүлбэр нь амьдрал дээр огт хэрэглэгдэхгүй, хэт ер бусын, хөгжилтэй байдлаараа онцлог. Жишээлбэл, “Шар муур намайг шүүж байна” гэх мэт сонирхолтой ч хэрэглээний бус өгүүлбэрүүд хэрэглэгчийн хэлний практикт тус болох нь ховор. Ингэснээр хэрэглэгч бодит ярианд хэрэглэж болохуйц чадвар, хэлний мэдрэмж эзэмшихэд хүндрэл учирдаг.
Duolingo — гадаад хэлийг анхан шатнаас сонирхолтой, энгийн аргаар сурахыг хүсэж буй хүмүүст тохиромжтой. Гэвч хэлний гүнзгий мэдлэг шаардсан, бодит хэрэглээнд тулгуурласан суралцахад тийм ч тохирох платформ биш. Гэсэн ч, энэ апп дэлхий даяар олон сая хүнд хэл сурах сэдэл өгч, хэл сурах үйл явцыг уйтгартай бус хөгжилтэй болгосонд талархалтай хандах нь зүйтэй.
