Монголын бүжигчид Австрид дэлхийг донсолгохоор байна, финал хүртэл 24 цаг

Латин формейшний ДАШТ маргааш Австрид болно

Латин формейшн бүжгийн Дэлхийн аварга шалгаруулах тэмцээн 12-р сарын 13-нд Австри улсад болох гэж байна. Энэ удаагийн ДАШТ-д Монгол Улсаа төлөөлөн “Star Dance”, “Moon Dance” хамтлагууд өрсөлдөхөөр очоод байгаа бөгөөд дэлхийн тайзан дээр Монголын нэр дахин тодрох мөч ойртжээ.

Монголын хоёр баг зэрэг хүч сорьж байгаа нь онцлог

Уг тэмцээний финалын шатанд Герман, Австри, Монголын багууд олон жил хүчтэй өрсөлдөж ирсэн гэж мэдээлж байна. Тиймдээ ч манай хамтлагуудын үзүүлбэрийг үзэгчид төдийгүй шүүгчид хүртэл тэсэн ядан хүлээдэг гэх яриа гарчээ. Монголын хувьд энэ удаа хоёр “хүчтэй” баг зэрэг өрсөлдөж буй нь тус тэмцээний онцлох дүр зураг болж байна.

“Star Dance” өөрсдийн дэглэлтээрээ ялгардаг

“Star Dance” хамтлагийн тухайд бүжгийн аяа Д.Даваахүүгээр хийлгэдэг ч дэглэлт, найруулгаа өөрсдөө хийдгээрээ олны анхаарлыг татдаг байна. Дэлхийн хэмжээнд өндөр зэрэглэлийн латин бүжиг дэглэдэг дэглээч цөөхөн байдаг гэж онцлохын зэрэгцээ тус хамтлагийн гол хөдөлгөгч хүч нь бүжиг дэглээч Д.Батсайхан, Н.Онондарь нар хэмээн нэрлэжээ. Тэдний бүтээлд Монгол гэх омогшил, эх орноороо бахархах мэдрэмж хүчтэй шингэдэг гэж үнэлсэн байна.

Өнгөрсөн жилийн финал ба “Монгол хийморь”-ийн өндөр хандалт

2024 оны ДАШТ-д “Star Dance” хамтлаг дөрөвдүгээр байрт шалгарч, “Финалын цом”-ын эзэд болсон байна. Мөн “Монгол хийморь” бүжгийн бичлэг “World Dance Sport Federation”-ийн YouTube хуудсанд байрласнаас хойш хамгийн өндөр хандалттай бичлэгээр нэрлэгджээ.

Энэхүү бүжгийг дэглээч Д.Батсайхан Монгол Улсын Засгийн газраас 2023–2025 оныг “Монголд зочлох жил” болгон зарласантай уялдуулан дэглэсэн бөгөөд дэлхийн тайзнаас эх орноо сурталчилсан нэгэн бүтээл болж байсныг онцолсон байна.

Энэ жил “Star Dance” шинэ ая, шинэ санаа амлаж байна

Энэ жилийн хувьд тус хамтлаг бүжгийн аяа шинээр бичүүлж, дэглэлт болон найруулгаа мөн л өөрсдөө хийжээ. Тиймээс “Star Dance” ямар сюрприз бэлдсэн бол гэсэн хүлээлт олон нийтийн дунд өндөр хэвээр байна. Үзэгч, шүүгчдийг юугаар гайхшируулах нь маргаашийн тайзан дээр тодорхой болох нь.

“Moon Dance” энэ удаа “Чингис хаан”-аар өрсөлдөнө

“Moon Dance” хамтлаг энэ жил “Чингис хаан” нэртэй бүжгээр оролцохоор зэхсэн байна. Тэд хэдхэн хоногийн өмнө стандарт бүжгийн ДАШТ-д амжилттай оролцож хүрэл медаль хүртсэн нь Ази тивээс медаль авсан ховор амжилтын нэг болж, түүх бүтээсэн гэж мэдээлжээ. Үүний дараахан латин формейшний ДАШТ-д шууд үргэлжлүүлэн хүч сорьж байгаа нь тэднийг дахин олны анхаарлын төвд аваачжээ.

Дэлхийн тайзан дээрх шалгалт ойртлоо

Ийнхүү уран нарийн мэдрэмж, чанд хатуу бэлтгэл, цуцашгүй хөдөлмөрийнхөө бодит үр дүнг үзүүлэх мөч тун ойртсон байна. Дэлхийн тайзан дээр эх орныхоо нэрийг цуурайтуулж, Монгол хүний ур ухаан, авьяасыг харуулах гэж буй “Star Dance”, “Moon Dance” хамтлагуудын тоглолт маргааш болно.