KAIST-ийн магистрын оюутан, гүйлтийн инфлюенсер Yoo Ji Won “2026 Seoul Race” хагас марафонд оролцож байхдаа ухаан алдан унаж, улмаар нас барсан харамсалтай хэрэг гарчээ.
Seoul Race зохион байгуулах хороо аравдугаар сарын 12-нд мэдэгдэл гаргаж:
“2026 Seoul Race-д оролцсон бүх хүмүүст маш харамсалтай мэдээ хүргэж байна. Аравдугаар сарын 11-ний өглөөний 08:49 цагийн орчимд хагас марафоны 20.6 км-ийн цэг дээр нэг оролцогч ухаан алдан унаж, яаралтай нөхцөл байдал үүссэн. Газар дээр нь анхны тусламж үзүүлсний дараа 119-ийн түргэн тусламжаар эмнэлэгт хүргэсэн ч харамсалтай нь нас барсан” гэжээ.
Барианаас ердөө 500 метрийн зайд унажээ
Seoul Race-ийн мэдээлснээр тухайн оролцогч хагас марафоны барианд орохоос ойролцоогоор 500 метрийн өмнө гэнэт ухаан алдаж унасан байна.
Газар дээр байсан эмнэлгийн ажилтнууд нэн даруй зүрх, уушгины сэхээн амьдруулах тусламж болон бусад яаралтай арга хэмжээг авчээ. Гэвч тэр ухаан ороогүй тул эмнэлэгт хүргэсэн бөгөөд тухайн өдөр нас барсан байна.
Зохион байгуулагчдын зүгээс:
“Талийгаачийн гэгээн дурсгалыг хүндэтгэн, гүн эмгэнэл илэрхийлье. Мөн гэнэтийн уй гашуутай нүүр тулсан ар гэрийнхэнд нь чин сэтгэлийн эмгэнэл илэрхийлж байна” гэж мэдэгджээ.
Yoo Ji Won “sub-3” амжилттай гүйгч байжээ
Дараа нь нас барсан оролцогч нь гүйлтийн инфлюенсер Yoo Ji Won байсан нь тодорхой болсон байна.
2001 онд төрсөн Yoo Ji Won KAIST-д AI semiconductor чиглэлээр судалгаа хийдэг магистрын оюутан бөгөөд сонирхогчдын дунд өндөр түвшний гүйгчээр танигдсан байжээ.
Тэрээр 2026 оны гуравдугаар сарын 15-нд болсон “2026 Seoul Marathon”-ы бүтэн марафоныг 2 цаг 56 минут 32 секундэд дуусгаж, гурван цагаас дотогш барианд ордог “sub-3” амжилтыг үзүүлсэн байна.
Түүний гэнэтийн нас баралтын мэдээ гарсны дараа фэнүүд болон гүйлтийн сонирхогчид Yoo Ji Won-ы сошиал хуудсанд эмгэнэл, дурсамжийн сэтгэгдлүүд үлдээж эхэлжээ.
