BIGBANG хамтлагийн гишүүн асан T.O.P-ийн хамгийн удаан хугацаанд ажилласан фэн нийгэмлэгүүдийн нэг Choidot 20 жилийн дараа үйл ажиллагаагаа зогсоож байгаагаа мэдэгдлээ. Тус хуудасны зохион байгуулагчид T.O.P болон түүний харьяалагддаг Topspot Pictures агентлаг фэнүүдийн дэмжлэгийг хангалттай үнэлдэггүй, харилцаа холбоо муу байсан нь ийм шийдвэр гаргахад хүргэсэн гэж тайлбарлажээ.
Choidot 2006 оны наймдугаар сарын 24-нд байгуулагдсан бөгөөд аравдугаар сарын 10-нд хаалтын мэдэгдлээ нийтэлсэн байна. Тэдний онцолсноор сүүлийн үед олны анхаарал татсан T.O.P, Nana нарын харилцааны талаарх мэдээлэл энэ шийдвэрийн гол шалтгаан биш аж.
Choidot-ийн X хуудсанд:
“Бодит байдалтай нүүр тулахаас татгалзах, хариуцлагаас зайлсхийх, шүтэн бишрэгчдийнхээ чин сэтгэлийг үл тоомсорлох зэрэг үйлдлүүдийг нь бид цаашид зүгээр орхиж болохгүй гэж шийдсэн” гэжээ.
Үзэсгэлэн цуцлагдсан нь бухимдлыг улам нэмэгдүүлэв
Маргааны нэг гол хэсэг нь T.O.P-ийн анхны бие даасан студийн цомог “Another Dimension”-оос сэдэвлэсэн фэн үзэсгэлэн байжээ.
Арга хэмжээг аравдугаар сарын 31-нээс арваннэгдүгээр сарын 1-ний хооронд зохион байгуулахаар төлөвлөж, нийт зардлыг есөн сая вон буюу ойролцоогоор 6700 ам.доллараар тооцсон байна. 300 тасалбар борлуулбал зардлын 7.5 сая воныг нөхөж, үлдсэн мөнгийг хоёр зохион байгуулагч өөрсдөө гаргахаар төлөвлөжээ.
Гэвч бүртгэлийн эхний долоо хоногт ердөө 20 орчим хүн тасалбар захиалсан байна. Хугацааг сунгаж, сурталчилгааг нэмэгдүүлсэн ч сонирхол хангалттай өсөөгүй аж.
Энэ үеэр T.O.P болон Nana нарын харилцааны тухай мэдээлэл олонд ил болж, зарим захиалга цуцлагдсан байна. Гэсэн ч зохион байгуулагчид үзэсгэлэнг цуцалсан гол шалтгааныг тэдний харилцаатай холбохыг няцаажээ.
Тэд фэнүүд энэ талаар өмнө нь мэдэж байсан бөгөөд гол асуудал нь T.O.P болон Topspot Pictures-ийн фэнүүдтэй харилцах байдал олон жилийн турш хангалтгүй байсан гэж тайлбарласан байна.
Фэнүүд агентлагийн ажлыг өөрсдөө хийдэг байсан гэжээ
Choidot-ийн мэдээлснээр фэнүүдтэй холбоотой олон ажлыг тус хуудас өөрөө хариуцаж иржээ. Үүнд гадаадын фэнүүдтэй харилцах, шинэ уран бүтээлийг сурталчлах, контент орчуулах, арга хэмжээ зохион байгуулах зэрэг багтсан байна.
Зохион байгуулагчид:
“Бид сайн дураараа энэ бүхнийг хийсэн ч гэлээ бидний зарцуулсан цаг хугацаа, хөдөлмөрийг үнэгүй зүйл мэт үзэж болно гэсэн үг биш” гэжээ.
Мөн T.O.P дөрөвдүгээр сард бие даасан цомгоо гаргасны дараа сурталчилгаа болон бусад уран бүтээлийн үйл ажиллагаа хангалтгүй байсан гэж шүүмжилсэн байна. Фэнүүд таван сарын турш дараагийн алхмыг хүлээсэн ч шинэ мэдээлэл бараг гараагүй гэжээ.
Үүний дараа аравдугаар сарын 10-нд Topspot Pictures албан ёсоор уучлалт хүсэж, фэнүүдтэй харилцах тал дээр дутагдал гаргаснаа хүлээн зөвшөөрсөн байна.
Агентлаг:
“Биднийг хүлээж байсан хүмүүстээ хангалттай мэдээлэл өгч, харилцах боломж бүрдүүлж чадаагүйгээс болж шүтэн бишрэгчид сэтгэл дундуур, бухимдалтай үлджээ. Чин сэтгэлээсээ уучлал эрж байна. Бид шүтэн бишрэгчдийнхээ санал хүсэлтийг цаашид илүү анхааралтай сонсож, уран бүтээлчийн үйл ажиллагаа болон компанийн нийт үйл ажиллагаанд идэвхтэй тусгана” гэж мэдэгджээ.
Мөн фэнүүдтэй харилцах системээ хэрхэн өөрчлөх, цаашид ямар арга хэмжээ авах талаар албан ёсны сувгуудаараа мэдээлнэ гэдгээ амласан байна.
